A conservación do noso medio natural necesita solucións prácticas. A enfermidade da tinta é un dos problemas máis graves para as nosas árbores, pero os avances en biotecnoloxía vexetal están cambiando o panorama.
Un vídeo recente da canle XuvenCiencia (http://www.youtube.com/watch?v=i10cBXvRkmA) explica ao detalle como funcionan os microenxertos in vitro. A técnica consiste en extraer o meristema, unha parte da planta de menos dun milímetro que xeralmente está libre de virus. Ese pequeno fragmento enxértase nun padrón seleccionado especificamente pola súa resistencia á tinta.
Como o cultivo se fai no laboratorio dentro de tubos de ensaio e con temperatura controlada, o proceso non se detén nin polo frío nin pola chuvia. O ritmo de crecemento acelérase e permítenos obter planta sa e resistente durante os doce meses do ano. Unha vez que estas plantas pasan do laboratorio ao campo, desenvólvense con total normalidade ata formar árbores grandes que producen froito de alta calidade.
É un traballo minucioso e de base científica que asegura a pervivencia dos nosos recursos.
