Asociación Galega das Castañas e dos Soutos

Asistencia á xornada sobre frondosas en xestión activa e o futuro dos nosos soutos

O pasado 15 de outubro desprazámonos á Escravitude (Padrón) para asistir á xornada «Frondosas en xestión activa: eficiencia, valor e futuro», organizada pola Fundación Paideia. O obxectivo do encontro era falar de como darlle pulo, rendibilidade e un futuro viable a este tipo de montes.

O noso motivo principal para acudir era poñer sobre a mesa e intentar resolver as dúbidas operativas que temos respecto ao desenvolvemento posterior á creación dunha agrupación forestal de xestión conxunta. Preocúpannos especialmente aquelas que teñen base territorial nos soutos e que se constituíron baixo a figura de asociacións sen ánimo de lucro.

Durante o evento tivemos a oportunidade de coñecer de primeira man como arrincaron outras iniciativas. A conclusión á que chegamos tras escoitar as súas experiencias bate coa realidade: este tipo de agrupacións necesitan un apoio económico extraordinario por parte da administración pública nos seus inicios. Sen ese pulo forte e directo, poñelas a funcionar resulta unha tarefa case imposible, xa que non chega unicamente cos recursos propios de quen traballa e coida a terra.

A parte máis proveitosa da viaxe foron os contactos estratéxicos que puidemos facer. Mantivemos unha conversa con Marga Fraga, directora técnica de Cultigar, para explorar posibles liñas de traballo conxunto de cara ao futuro, centradas sempre nas necesidades do castiñeiro.

Ademais, tivemos un encontro de carácter máis informal con Xiana Albor, presentadora do evento e tamén presidenta do padroado do Parque Nacional das Illas Atlánticas. A idea desta charla foi ir tecendo as primeiras redes para poder colaborar con ela en actividades futuras.

Scroll al inicio