O pasado xoves, 30 de abril, mantivemos unha reunión telemática de traballo cos responsables da Axencia Galega da Industria Forestal – XERA. Esta foi a segunda vez que nos xuntamos con eles neste ano e aproveitamos a conexión para facer un repaso minucioso de todos os asuntos que xa trataramos na primeira xuntanza.
Durante a conversa trasladáronnos unha mensaxe moi clara de apoio. Confirmaron que os investigadores de Lourizán están á nosa enteira disposición para calquera cousa que poidamos necesitar no noso día a día.
Tamén repasamos as xestións administrativas que temos agora mesmo en marcha. En concreto, explicáronnos que as axudas SAVIA Formación IN501A 2025, pensadas especificamente para apoiar o desenvolvemento de actividades formativas, vanse resolver en breve. Estamos moi pendentes de que saia esta resolución, xa que é a primeira vez que dende a Asociación presentamos unha solicitude formal para organizar este tipo de formación.
Para rematar e con vistas a gañar presenza, empezamos a falar dunha proposta de futuro. Puxemos sobre a mesa a posibilidade de contar cun stand propio que represente á Asociación na feira Galiforest do ano 2028. Seguimos traballando paso a paso para consolidar a nosa actividade.
