O sector da castaña en Francia atravesa unha fase de reestruturación. Segundo un estudo recente do Sindicato Nacional de Produtores de Castañas (SNPC) realizado a principios de 2026 a 26 empresas, existe unha necesidade urxente de organizar o sector a nivel nacional. O obxectivo inmediato é frear o retroceso do consumo de castaña fresca.
Os datos do informe apuntan a un problema de subministración para a propia industria, que necesita importar 17.000 toneladas das 25.000 que procesa en total, mentres que a produción francesa sitúase en torno ás 9.000 toneladas. Os retos son variados e inclúen desde o envellecemento dalgunhas plantacións no sueste do país con árbores de ata douscentos anos, ata o avance de problemas fitosanitarios e do cambio climático.
A competencia externa é un factor de presión engadido, destacando o caso de Portugal, que alcanzou un potencial de produción de 60.000 toneladas. Para combater estas adversidades e a idea de que a castaña é complicada de preparar na casa, en Francia están a poñer o foco no Plan Nacional da Castaña iniciado en 2024 e nunha mellora da comunicación para situar o produto adecuadamente na distribución comercial.
A información completa e orixinal sobre este estudo está dispoñible nesta LIGAZÓN.
